Amosando publicacións coa etiqueta Viaxeiros por papel. Amosar todas as publicacións
Amosando publicacións coa etiqueta Viaxeiros por papel. Amosar todas as publicacións

luns, 16 de setembro de 2024

Apertura de inscrición aos Clubs de lectura

Este curso seguimos desenvolvendo actividades relacionadas coa lectura en horario extraescolar polas tardes.

Presentámosvos os diferentes Clubs de Lectura e Diálogo aos que poderedes inscribirvos. A continuación tedes toda a información de cada unha destas actividades organizadas dependendo o curso no que esteades este ano.

Esta preinscrición deberá confirmarse coa entrega do formulario de inscrición que vos  entregará a mestra mediadora dos respectivos clubs. Esta entrada actualizarase periodicamente para informar dos clubs que esgotaron xa as súas prazas.

Aniversario de Emilia Pardo Bazán

A pasada semana retomas as clases, o mércores participamos da festa de benvida con diferentes postos para a lectura e para gozar aprendendo cos robots e coas pezas de construción.

Hoxe celebramos o aniversario de Emilia Pardo Bazán cunha homenaxe decorando unhas máscaras que inclúen unha biografía da autora que dá nome ao noso colexio. Nesta entrada publicaremos as imaxes nas que todo o centro lle cantará o Feliz aniversario! e tamén leremos a biografía lucindo as nosas máscaras. Lembrámosvos que podedes aprender sobre Emilia Pardo Bazán no PDI "Paseando con Emilia".

xoves, 7 de marzo de 2024

xoves, 21 de decembro de 2023

Tardes na biblioteca

Neste mes foron finalizando e comezando lecturas diversas os diferentes clubs de lectura que se desenvolven na biblioteca.

Os viaxeiros por papel lerán unha nova versión poética do conto de Carapuchiña vermella co libro "La noche de la visita". Os BookClub visitaron Londres, mentres Papalibros rematou o cómic de "El árbol que crecía en mi pared" e as Bolboretas Lectoras comezaron "La guerra de Catherine".

Pola súa parte, o alumnado participante en ENRE2 EPB rematou o xogo de Botánicula e no mes de xaneiro comezaremos cunha nova obra.

En diálogos filosóficos continuaron coa construción dunha nova mirada a través das súas conversas.

Nestas presentacións poderedes ver algunhas imaxes dos encontros.

martes, 5 de decembro de 2023

Visita de Rosa Aneiros

O pasado venres Viaxeiros por papel recibiu a visita de Rosa Aneiros!!! A autora de "Catro plumas de dinosauro" contou como se lle ocurriu a historia e moitas cousas máis no encontro que tivo co alumnado de 4ºEP participante no club de lectura. Moitas grazas!!!!

venres, 15 de setembro de 2023

Clubs de lectura e diálogos

Este curso seguimos desenvolvendo actividades relacionadas coa lectura en horario extraescolar polas tardes.

Presentámosvos os diferentes Clubs de Lectura e Diálogos Filosóficos aos que poderedes inscribirvos. A continuación tedes toda a información de cada unha destas actividades organizadas dependendo o curso no que esteades este ano.

domingo, 12 de febreiro de 2023

Postal da amizade


No club de lectura "Viaxeiros por papel", estiveron lendo o libro Lena, Theo y el mar escrito por Maria Parr, para dar a coñecer esta obra Xiana e Carlota propuxeron ao alumnado de 1º e 3º de EP realizar unha "Postal da amizade", así o luns 13 e o martes 14 desenvolverán este obradoiro na biblioteca no que poñerán en valor a amizade que tan ben representan Lena e Theo.

venres, 30 de decembro de 2022

Feliz 2023!

Hai unhas semanas os clubs de lectura do colexio recibiron o terceiro premio dos clubs de lectura escolares 21/22 do Ministerio de educación, aproveitamos a ocasión para felicitar tanto ao alumnado como ao profesorado mediador destes e para que, a través deste vídeo, os participantes vos animen a unirvos a un dos clubs que están a desenvolverse.

Feliz 2023!

martes, 11 de xaneiro de 2022

Viaxeiros por papel en 4º

En febreiro comezaremos cun novo grupo/s de Viaxeiros por papel. Desde esta semana, os nenos/as de 4º de Educación Primaria interesados en achegarse xuntos á lectura, poderán inscribirse no club de lectura Viaxeiros por papel. Como no resto de grupos terá que haber un mínimo de 6 alumnos/as do grupo clase para poder levarse a cabo, xa que debido a protocolo sanitario non podemos mesturar alumnado de distintos grupos no mesmo espazo.

A periodicidade será mensual, polo que os primeiros mércores de mes teredes unha cita na biblioteca cos libros e con diversas actividades relacionadas coa lectura.

mércores, 2 de xuño de 2021

Tarde poética

Os clubs de lectura Viaxeiros por papel e Bolboretas lectoras encaran o final da súa viaxe co último libro que lerán durante este curso. No caso do alumnado de 6º de E.P. será Corazón de pájaro de Mar Benegas e Rachel Caiano da editorial Akiara, pola súa banda as nenas de 5º de E.P. lerán un clásico, trátase de El libro inclinado de Peter Newell da editorial Thule. Como podedes observar rematamos con poesía.

Para introducir ambos libros e a poesía acudiron Ana e Clara, bibliotecarias da B.M. Los Rosales.

mércores, 19 de maio de 2021

Paseamos por Coruña

O final da lectura de Jules Verne e a vida secreta das mulleres planta trouxo con el un percorrido pola cidade da man das bibliotecarias da B.M. Los Rosales, que ademais de presentarnos diversas especies de árbores da cidade tamén nos propuxeron un reto no que descubrir os lugares agachados no mapa e que a Jules Verne lle gustaría coñecer na Coruña, igual que fai coas rúas de Vigo.

xoves, 8 de abril de 2021

Bolboretas lectoras

Mentres o club de lectura "Viaxeiros por papel" continúa coa lectura de Jules Verne e a vida secreta das mulleres planta escrito por Ledicia Costas e editado por Xerais, o grupo de 5º de E.P. xa ten nome, as "Bolboretas lectoras". Estas nenas comezaron unha nova obra, trátase de Destellos escrito por Jen Wang e editado por Sapristi cómics. Esta premiada novela gráfica, que nos demostrará a importancia e o valor da amizade, será nas próximas semanas centro das conversas do club.

sábado, 16 de xaneiro de 2021

La guerra de Catherine

A biblioteca retoma as actividades habituais logo das vacacións. O club de lectura "Viaxeiros por papel" comezou o mércores unha nova lectura, trátase de "La guerra de Catherine", o cómic de Julia Billet e Claire Fauvel da editorial Astronave e que foi premiado no 2018 como Mellor Cómic Xuvenil do Festival de Angoulême. Nas proximas sesións do club os nenos/as acompañarán a Rachel na súa viaxe desde A Casa dos nenos de Sèvres.

sábado, 19 de decembro de 2020

Viaxeiros por papel en liña con Diego Arboleda

Onte pola tarde compartimos uns minutos dialogando con Diego Arboleda sobre a súa obra "Prohibido leer a Lewis Carroll". Aínda que tamén abordamos temas como o proceso creativo das súas obras, a relación que establece cos ilustradores/as, compartiu algunhas curiosidades sobre as personaxes do libro, vimos algunhas das edicións noutros idiomas, como a que se publicou en idioma chinés.

xoves, 17 de decembro de 2020

Encontro virtual con Diego Arboleda

Os nenos/as do club "Viaxeiros por papel" estiveron lendo a obra de Diego Arboleda e Raúl Sagospe "Prohibido leer a Lewis Carroll". Durante este período de tempo falaron sobre a historia, dialogaron sobre as personaxes e gozaron compartindo opinións sobre o libro. Contamos coa colaboración da Biblioteca Municipal de Los Rosales e das súas bibliotecarias, que prepararon este fermoso vídeo, colofón da primeira etapa do club, no que aparecen as nenas/os e tamén as mestras mediadoras.

xoves, 15 de outubro de 2020

A voar!

Chegou o día no que inician o seu vo os clubs de lectura Viaxeiros por papel, no que participan nenas/os de 6º de E.P., e o que comeza este curso con nenas de 5º de E.P.