ENRE2 nas Xornadas de Biblioteca Creativa

Este próximo mércores presentaremos dentro da Xornada de biblioteca creativa 2025 a experiencia de creación e desenvolvemento do Club de videoxogos ENRE2 EPB que botamos a andar no curso pasado. Aproveitamos para lembrar que ontes comezamos a xogar a Gorogoa e no que o alumnado tivo a oportunidade de pensar xuntos no significado das imaxes que se ían presentando ao longo do xogo e tamén nos mecanismos de xogo que se presentan nesta obra de Buried Signal, na que a banda sonora está composta por Joel Corelizt e publicado por Annapurna.

Unha nova viaxe...

Segunda sesión de ENRE2 EPB na que nos seguimos movendo pola natureza, hoxe comezamos unha viaxe cun home vello que percorrerá, ademais dun camiño pola contorna natural, un camiño pola súa propia vida, na que terá que enfrontarse a diferentes situacións, algunhas moi alegres e outras non tanto.

ENRE2 EPB está de volta

Comezou a segunda edición de ENRE2 EPB, o club de lectura de ficción dixital, na que nos achegaremos a diferentes videoxogos. Os obxectivos serán que os nenos/as coñezan outra concepción dos xogos, nos que as paletas de colores, o modo de xogar, a música, a interrelación entre o xogador/a e o xogo, en definitiva, achegarnos a diferentes temas desde un punto de vista artístico.

Xogamos a construír

Na primeira sesión deste ano en ENRE2 EPB xogamos a unha nova obra na que tivemos que construír un pobo imaxinado, porque non todas as construcións son iguais.

Estamos de volta!

O pasado luns comezamos as clases, aínda que como xa sabedes necesitamos un tempo para organizar os espazos e recursos da biblioteca. Deste xeito a biblioteca non estará aberta ata o luns 2 de outubro. Non vos preocupedes mentres tanto, tedes as bibliotecas de aula con libros moi interesantes e pronto chegarán as caixas de Tédelos que coñecer! cunha variedade de libros que fará que estas semanas pasen máis rápido.

Nas próximas semanas comezaremos coa formacións de usuario dos grupos de voluntarios de biblioteca, do profesorado e das distintas aulas para que recordedes o funcionamento da biblioteca.

Mergúllate na información

Reanudamos o concurso de procura de información relacionado co PDI Mergúllate! Cada semana proporanse varias preguntas relacionadas cos mares e océanos. As repostas poderedes atopalas nos libros da exposición do proxecto, na selección de recursos dixitais elaborada polo equipo de biblioteca ou noutros recursos que tedes na rede, lembrade seguir as estratexias desta infografía para obter información fiable. As clases que participen recibirán como recompensa algúns dos recursos que temos dispoñibles na biblioLab.

A biblioteca do Nautilus

“O espectáculo daquelas augas ricas en especies a través dos paneis do salón, a lectura dos libros da biblioteca e a redacción dos meus apuntamentos empregaban todo o meu tempo e non me deixaban nin un minuto para o aburrimento ou o cansazo.” Xulio Verne (20.000 leguas de viaxe submarina)
Estas palabras de Xulio Verne na obra 20.000 leguas de viaxe submarina son parte das alusións que fai o autor na obra e na que describe como é a biblioteca do famoso submarino Nautilus, un tipo de biblioteca que foi evolucionando co tempo, pero que se mantén viva, por isto o día 24 de outubro celébrase o Día das bibliotecas, que como xa sabedes doutros anos promove desde 1997 a Asociación de Amigos del Libro Infantil y Juvenil e na que están implicadas todas as bibliotecas do estado. O lema desta edición é “Bibliotecas: ler, aprender, descubrir” incide en “destacar o papel das bibliotecas de diferente tipoloxía como espazos libres, diversos e abertos para o acceso á cultura e o coñecemento, a partir da lectura e do conxunto de recursos que permiten a aprendizaxe e posibilitan o descubrimento doutras ideas, doutras persoas, outras culturas e outros mundos”.

Finaliza o concurso "Paseando con Emilia"

O concurso "Paseando con Emilia" chega ao final logo de 15 semanas con diversas preguntas relacionadas con Emilia Pardo Bazán, que nos axudaron a aprender moito sobre a escritora coruñesa, agardamos que tamén vos servise para aprender a atopar información na rede.

Concurso Semana 15

As desta semana serán as últimas preguntas do concurso "Paseando con Emilia". Durante 15 semanas achegámonos a través das diversas cuestións sobre distintos aspectos da vida de Emilia Pardo Bazán, diversas personaxes, institucións e acontecementos históricos que compartiron época coa escritora galega.

Nesta última semana as preguntas recompilarán e refresarán o aprendido sobre Emilia durante o curso.

Concurso semana 14

Dende Licenza CC BY-SA

Esta semana, o mércores 12 de maio, conmemórase o centenario da morte de Emilia Pardo Bazán, e ademais celebramos o día das Letras Galegas, que será o próximo luns 17 de maio, este ano adicado á poeta Xela Arias.

Nesta ocasión as preguntas estarán referidas a esta celebración das Letras Galegas e a autora homenaxeada este ano.

Aos recursos de Paseando con Emilia engadimos as seguintes ligazóns, nas que poderedes atopar información relativa ás preguntas que aparecen no formulario desta semana:

RAG

Primavera das Letras

Portal das Palabras

Concurso semana 13

Proximamente cumpriranse 100 anos da morte de Emilia Pardo Bazán. Queremos lembrar nas preguntas desta semana esta data e os motivos que provocaron o seu falecemento.

Aos recursos de Paseando con Emilia engadimos as seguintes ligazóns, nas que poderedes atopar información relativa ás preguntas que aparecen no formulario desta semana:

Centros para o control e prevención de enfermidades

Federación Española de Diabetes

Concurso semana 12

As preguntas desta semana estarán referidas , na súa maior parte, a unha das súas fillas de Emilia Pardo Bazán e ao papel que desenvolveu na sociedade.

Ao recursos de Paseando con Emilia engadimos as seguintes ligazóns, nas que poderedes atopar información relativa ás preguntas que aparecen no formulario desta semana:

Wikipedia

CEIDA

RAG

Concurso semana 11

Photo by Jaredd Craig on Unsplash

Esta semana está adicada ao libro, xa que o próximo venres será 23 de abril será o Día do libro, polo que continuamos coas preguntas relacionadas co libro no cuestionario desta semana. Ademais da selección de recursos relacionados con Emilia Pardo Bazán  engadimos a ligazón dun vídeo no que se explican as partes dun libro. Lembramos que tedes as distintas propostas que realizamos esta semana para conmemorar esta data tan especial para o equipo de biblioteca.

Concurso semana 10

Photo by Laura Kapfer on Unsplash

O próximo 23 de abril será o Día do libro, así que as próximas dúas semanas as preguntas estarán relacionadas cos libros que escribiu Emilia Pardo Bazán durante a súa vida e tamén por aqueles relacionados con ela que escribiron outras persoas, que estudiaron moito tanto sobre a súa vida como a súa obra.

Concurso semana 9

Do 8 ao 12 de marzo celebrouse a Semana da prensa, por este motivo as preguntas do concurso estarán vencelladas ao labor xornalístico que desenvolveu Emilia Pardo Bazán, máis concretamente a que realizou nunha das súas viaxes por Europa, en concreto á Exposición Universal de 1889.

Concurso semana 8

Photo by Thought Catalog on Unsplash

Como sabedes estamos celebrando a semana da poesía, por este motivo cremos que as preguntas do concurso debían estar relacionadas. Aproximarémonos á única obra de poesía que escribiu Emilia Pardo Bazán, prestade atención ás preguntas!

Concurso semana 7

Fonte: ©La Voz de Galicia

 A pasada semana comezamos o  desenvolvemento da tarefa de Paseando con Emilia feminista, no que tratamos de descubrir as rúas da Coruña que teñen nome de muller e quen foi cada unha delas. Xa comezamos a recibir os traballos dos nenos/as que xa están expostos nas escaleiras do centro e tamén no mapa virtual que temos na páxina web do proxecto.

 Esta semana preguntaremos pola información que conteñen estes traballos elaborados polo alumnado de diversos cursos de Educación Primaria e sobre as pegadas de Emilia Pardo Bazán na cidade.

Concurso semana 6

O 8 de marzo celébrase o Día da muller. Emilia Pardo Bazán destacou por defender o papel da muller na sociedade e reclamar a igualdade de oportunidades. Foi precursora do movemento feminista, tanto nas súas obras como nos seus artigos reclama a mesma educación para a muller que para os homes.

Esta semana nas preguntas do concurso tratamos que coñezades a outras mulleres galegas que destacaron polo seu labor en prol da igualdade das mulleres e dos homes, pero tamén pola súa relevancia social, cultural e profesional, nunha época na que era moi complicada esta igualdade, de feito moitas delas foron as primeiras no seu ámbito.

8M Día da muller

Na semana do 8 ao 12 de marzo queremos visibilizar o labor das mulleres e concienciar na importancia da igualdade na vida en sociedade, así como resaltar aqueles estereotipos que moitas veces pasan desapercibidos.

Concurso semana 5

Esta semana achegarémonos á obra de Emilia Pardo Bazán e a ambientación que fai nalgunha delas na Coruña, deste xeito achegámonos á cidade tal e como era hai máis de 100 anos.

O concello de A Coruña vén de presentar o programa de homenaxe á escritora coruñesa con 40 eventos previstos para o presente ano, está xa a poñer en marcha algunhas destas actuacións. Unha delas son as mensaxes de Emilia e de figuras que a coñecen en profundidade, como Isabel Burdiel e Marilar Aleixandre, que están pintadas nos pasos peonís dalgunhas das rúas da cidade. Un bo motivo para pasear e coñecer a nosa cidade.