Amosando publicacións coa etiqueta visita. Amosar todas as publicacións
Amosando publicacións coa etiqueta visita. Amosar todas as publicacións

martes, 23 de xuño de 2026

PILAR NOS CONTA COUSAS SOBRE O BARRIO DOS ROSALES

O pasado luns 15 de xuño a nosa veciña Pilar visitou o grupo de 4ºC para contarlles como era o barrio vai 70 anos. 

O que máis lles chamou a atención foi que era unha pequena aldea con casiñas de pedra e as súas lareiras e cuadras para os animais. Tiñan que recoller a auga na fonte con sellas e para pasar á cidade a vender tiñan que pagar un "fialato". 

E a que non sabedes que o noso cole era unha canteira? Para chamar por teléfono ían ao Bar La Parra e tamén recibían os recados alí pero tamén sabían novas grazas ás campás da igrexa. 

Pilar dixo que agora estaba contenta no barrio porque tiña moitas cousas: centro médico, colexios, comercios... pero que votaba en falta a colaboración entre veciños e veciñas porque se coñecían todos e a aos alumnos e alumnas de 4º o que máis lles gustou foi imaxinar os xogos en tanto espazo como tiñan.

O grupo de 4ºC agradécelle a Pilar a súa visita  xa que reviviron con ela aquela época na que comezaba todo no barrio dos Rosales.


Aquí vos deixamos un pequeno vídeo. 



luns, 8 de xuño de 2026

XOSÉ. A. TOURIÑÁN EN EMILIA NA ONDA!!!


 Pois si, estás lendo ben. Visitounos o humorista, actor e veciño da Coruña: XOSÉ. A. TOURIÑÁN!!!

Foi un día moi emocionante, polo cal levábamos agardando moito tempo. E saiu a pedir de boca. A verdade é que se nota que Xosé se dedica a isto da comunicación. E temos que dicir que o noso alumnado de 2ºEP fíxolle unha entrevista moi á altura.

Non podemos estar máis contentos/as no Emilia con esta visita. 

Aquí vos deixamos un vídeo para que sempre o poidamos recordar. Pero, como dixo Xosé que estivera moi cómodo, igual volvía...

E tamén a entrevista na radio que estivo moi entretida e divertida! ESCOITADEA, estes nenos e nenas parece que van á radio todos os días! AQUÍ TE ESPERAMOS, TOURI!

luns, 1 de xuño de 2026

RUBÉN SANTAMARTA (director actual do xornal "La Voz de Galicia" en EMILIA NA ONDA!

O pasado venres 29 de maio, visitounos Rubén Santamarta, persoa relevante para a nosa cidade por ser o actual director do xornal "La Voz de Galicia".

O alumnado de 2ºC fixo sobre el unha tarefa de investigación e plasmaron as súas pesquisas en formato "mural". Este mural lle foi entregado a Rubén Santamarta durante a súa visita no colexio.

Ademais, o grupo de 2ºC entrevistou a Rubén na nosa emisora "Emilia na Onda" para que todos e todas o poidades coñecer mellor. Aquí vos deixamos o podcast que se gravou e unhas fotografías da visita e gravación. 





xoves, 16 de abril de 2026

FAMILIAS, VIDE CONTAR UN CONTO... OU O QUE QUEIRADES!


Co motivo da celebración do día do libro, desde a biblioteca EPB queremos convidar a todas as familias do colexio a  visitarnos para contar un conto, un poema, dramatizar algo, contarnos algo relacionado coa cidade da Coruña...

Queremos que poidades desfrutar de pasar un bo rato cos vosos cativos e cativas e que poidades colaborar coas actividades propostas polo equipo da biblioteca. 

Apostamos por unha conexión familia - escola real e nos gustaría compartir con vós estes momentos, que ademais, aos que máis ilusión lles fai é aos vosos nenos e nenas.

CANDO PODEDES VIR?

Desde o luns 20 de abril ata o xoves 30 de abril do 2026 en horario de mañá. 

COMO ME PODO INSCRIBIR?

Pinchando no seguinte enlace e cubrindo os vosos datos. 


Animádevos a participar! 

xoves, 18 de decembro de 2025

PROGRAMA DE RADIO DECEMBRO 2025

 Boas!

Hoxe vimos compartir o noso primeiro programa de radio do curso. O que coincide coas datas máxicas do Nadal. Tamén vos queremos contar que tivemos a grande sorte de participar nas Xornadas de "Radio na Biblio" que tiveron lugar hoxe, xoves 18 de decembro do 2025 en Santiago e ás que foron parte do alumnado de 5ºEP, que este ano, se formará na radio para comezar a elaborar proxectos e seguir estes en 6ºEP.

O mundo da radiofonía é un mundo máxico, que che permite facer chegar esas ideas, creacións e imaxinación da rapazada coma se fosen estrelas que alumean aos oíntes a través dun único canal: a voz.

E, sen máis detalles, vos deixamos  unhas fotografías na xornada de "Radio na Biblio" que vivimos e ao final desta publicación, tamén, por suposto, o noso primeiro programa de radio para que o poidades escoitar.







Ata pronto, lectores e lectoras! 

mércores, 15 de maio de 2024

Encontro con Andrea Maceiras


Esta semana recibimos a Andrea Maceiras para conversar co alumnado de 6ºEP sobre as obras que leron ao longo do curso. Ademais de comentar sobre as personaxes, o proceso de creación literaria tamén se achegaron á profesión de escritora e algunhas cuestións personais da autora.

mércores, 21 de febreiro de 2024

Encontro con Angélica Sátiro

Xornada compartida con Angélica Sátiro no colexio, visitounos para compartir con alumnado e profesorado os seus coñecementos sobre filosofía e sobre o fomento da creatividade. Pola mañá estivo co alumnado de 5º de EP para que lle fixesen unha entrevista, previamente prepararon o encontro cunha serie de cuestións que lles pareceron de interese despois de coñecer a biografía e traballos de Angélica. Esta entrevista a poderedes escoitar na próxima edición de Onda Ti, que se publicará o venres 22 de marzo.

venres, 3 de novembro de 2023

Oubeos na biblioteca

O pasado martes visitou o colexio Francisco J. Lema, de profesión veterinario e experto no mundo do lobo en Galicia. A xornada comezou cun encontro co alumnado de 6º de EP no que descubriron moitas das curiosidades que lles contou o noso convidado e a realidade do animal nos montes e bosques de Galicia, tamén puideron comprobar, con mostras e vídeos que nos trouxo, como son e como se moven os lobos.

luns, 30 de xaneiro de 2023

A emigración galega

Hoxe, 30 de xaneiro celébrase o Día Escolar da Non violencia e a Paz, no que, ademais das diversas propostas que xurdiron desde o EACE e EDLG, quixemos promover a influencia que tivo en Galicia a emigración, no que, por motivos de guerra, económicos, entre outros, moita poboación tivo que abandonar a súa terra, como actualmente sucede noutros países ou rexións do planeta. Podedes ler algunhas das "Historias de ida e volta" do Consello da Cultura Galega.

Ademais da exposición de fondos relacionados co tema para todas as idades, o alumnado recreou diversas imaxes relacionadas coa emigración nas que tiveron que integrarse tanto nas emocións que se transmitían nelas como na indumentaria. Nesta entrada iranse publicando as fotografías que se vaian realizando.

Mañá ás 12h recibiremos na biblioteca ao Premio Nacional de Literatura Xesús Fraga, na que nos falará de primeira man do que supuxo e do que supón a emigración en Galicia, mañá activarase unha entrada na que se poderá seguir o encontro en directo. O alumnado de 6ºEP faralle unha entrevista no estudio de radio de Emilia na Onda.

luns, 19 de decembro de 2022

Entrevista a Cristina Pato

A semana pasada, e aproveitando a visita ao centro de Cristina Pato, o alumnado de 6ºEP entrevistou integramente en inglés á, entre outras facetas, escritora e música no estudio de Emilia na Onda. Queremos agradecerlle a xenerosidade que demostrou con nós durante toda a xornada.Nesta entrevista atoparedes moita información sobre o patrimonio que vos axudará nas vosas investigacións, dentro do PDI Galeguízate!, sobre o patrimonio material e inmaterial de Galicia.

luns, 7 de marzo de 2022

Semana da Muller e o mar

Mañá 8M celébrase o Día da muller, para unirnos a esta visibilización do papel da muller na sociedade teremos con nós esta semana a tres mulleres profesionais que teñen vinculación co mar. Na entrada da biblioteca xa tedes a exposición con libros de ficción e non ficción na que as mulleres e nenas son as protagonistas.

O EACE montou un mural no corredor de entrada ao centro que...

Recordade que o ODS número 5 reclama a "Igualdade de xénero", unha igualdade real en todos os ámbitos da sociedade e na que haxa unha igualdade de oportunidades.

venres, 28 de xaneiro de 2022

Semana da paz

O próximo 30 de xaneiro celebrarase o Día Escolar da Non violencia e a Paz. Este curso, con motivo de que no noso PDI Mergúllate! estamos a investigar sobre os mares e océanos, queremos recordar que cada ano rexístranse miles de traxedias no mar con persoas que fuxen de conflitos desde os seus países procurando un futuro mellor para si mesmos e para as súas familias. Só nos seis primeros meses de 2021 1.140 persoas morreron no mar Mediterráneo tentando chegar a Europa.

Durante a próxima semana acudirán ao centro persoas que viviron en persoa estas traxedias, en primeira persoa ou como membros de organizacións que tratan de axudar a estas persoas que fuxen dos seus países. A frase de Emilia Pardo Bazán sigue acollendo a todos/as na entrada da biblioteca "Detesto a violencia...", rexeitemos todos a violencia.

O equipo de EACE e EDLG prepararon un mural e un documento con recursos para desenvolver nesta conmemoración.

mércores, 3 de novembro de 2021

Novembro mes da ciencia en galego

Como todos os cursos en novembro celebramos o mes da ciencia en galego. Desde a Consellería de Cultura, Educación e Universidade, en colaboración coa Secretaría Xeral de Política Lingüística, vense impulsando esta celebración nas propias bibliotecas. Editan un folleto co que dar visibilidade a esta conmemoración, neste folleto inclúese un manifesto elaborado por Amparo Alonso Betanzos, enxeñeira química e investiagdora en intelixencia artifical e que foi premio María Wonenburger 2020, no que se fai mención ó labor das bibliotecas en prol do coñecemento, os descubrimentos...

Mañá visitarannos Carlota e Ángeles para ensinarlle ao alumnado de 4º de EP o labor que se desenvolve no Oceaneográfico, ver algúns dos intrumentos que se utilizan e aprender sobre a figura de Ángeles Alvariño, dentro do programa La vida marina al microscopio.

luns, 14 de xuño de 2021

Radio Na Biblio

Durante este curso estivemos aprendendo con Laboratorio de Radio a facer radio, grazas a inclusión do centro no programa Radio na Biblio, así como pola colaboración co centro de Axuda en Acción. Foron uns meses nos que o alumnado preparou entrevistas, historias e monográficos. Despois de preparalas tocou gravalas, algunhas delas fixéronse no estudio de radio, pero outras tiveron como escenario a BiblioLab. Os nenos/as desenvolveron os papeis de guionistas, locutores/as e de técnicos de son que se aseguraban de que o son era o correcto e que a gravación tiña a calidade axeitada.

Nesta entrada publicamos as últimas entrevistas que faltaban por difundir, pero podedes acceder a todas na sección correspondente da nosa canle Emilia na onda en iVoox.

domingo, 13 de xuño de 2021

Visita virtual á Biblioteca de Estudos Locais

As clases de Educación Primaria poderán visitar esta semana a Biblioteca de Estudios Locais a través do vídeo que gravaron as bibliotecarias da Biblioteca Municipal de Los Rosales, coa colaboración da directora, Mª Milagros García, e o equipo de traballo da Biblioteca de Estudios Locais. Nesta visita poderedes coñecer os espazos, os recursos e algunha das obras que teñen de Emilia Pardo Bazán e de Marineda.

Agradecemos a colaboración de todo o equipo das Bibliotecas Municipais por achegarnos o seu traballo.

luns, 24 de maio de 2021

Contacontos Educación Infantil

O martes 24 de maio acoden á biblioteca as bibliotecarias da B.M. Los Rosales para contarlles uns contos aos nenos/as de Educación Infantil. Debido ao protocolo sanitario establecido polo centro debido á pandemia entre cada grupo que veña á biblioteca haberá unha espera de 15' para o acceso da seguinte clase. Só virá un grupo de cada idade, por este motivo o resto de aulas poderán seguir a retransmisión do contacontos a través da ligazón desta entrada.

Agradecemos a preparación desta actividade a todas as bibliotecarias da Biblioteca Municipal e agardamos que non haxa problemas técnicos para que poidades seguir en directo sen problemas a actividade. De todos os xeitos os contacontos gravaranse e poderán estar a disposición das clases que o soliciten.

sábado, 10 de abril de 2021

Crónica de ASOTRAME


Esta é a crónica que elaborou o alumnado de 5ºC de Educación Primaria sobre a visita de Toni á biblioLab para a entrevista que lle fixeron coa axuda de Laboratorio de Radio:

O martes 23 de Marzo de 2021, a clase de 5ºC coñecimos un pouco máis sobre o cancro e sobre ASOTRAME, “Asociación Galega de Trasplantes de Medula Ósea”. Para iso, estivo connosco Toni Platas.

domingo, 20 de decembro de 2020

Visita á Casa Museo Emilia Pardo Bazán

O Proxecto Documental Integrado "Paseando con Emilia" tiña que ter unha parada obrigatoria na casa da autora coruñesa, pero debido á pandemia coa que estamos a convivir non é posible que todos os nenos/as do noso centro acudisen durante este curso, pero non nos resignamos a que o alumnado do colexio se perdese a visita a Casa Museo Emilia Pardo Bazán.

Xulia Santiso e Patricia Angulo, directora e educadora da Casa Museo Emilia Pardo Bazán, prepararon unha visita moi especial para vós na que vos amosarán o fogar de Emilia e na que vos darán detalles sobre a súa vida e sobre algúns aspectos destacados do s.XIX. Agradecémoslles toda a súa axuda e colaboración no desenvolvemento deste proxecto. O luns ás 10h. todas as aulas do colexio visitarán de xeito virtual a casa na que naceu a protagonista do proxecto de investigación deste curso.

sábado, 19 de decembro de 2020

Viaxeiros por papel en liña con Diego Arboleda

Onte pola tarde compartimos uns minutos dialogando con Diego Arboleda sobre a súa obra "Prohibido leer a Lewis Carroll". Aínda que tamén abordamos temas como o proceso creativo das súas obras, a relación que establece cos ilustradores/as, compartiu algunhas curiosidades sobre as personaxes do libro, vimos algunhas das edicións noutros idiomas, como a que se publicou en idioma chinés.

venres, 29 de maio de 2020

Viaxeiros por papel

O club de lectura Viaxeiros por papel estivo conversando onte co autor do libro que estiveron lendo durante este mes. Ao longo deste período gozaron e divertíronse coa poesía de Vaia tropa! de Antón Cortizas editado por Xerais.